Capello gæti hætt með enska landsliðið

Samkvæmt heimildum BBC-fréttastofunnar gera forráðamenn enska knattspyrnusambandsins ráð fyrir því að Fabio Capello hætti með enska landsliðið fari svo að liðið komist ekki upp úr riðlakeppni Heimsmeistarakeppninnar.

Enska knattspyrnusambandið vill ekki ræða þennan möguleika í fjölmiðlum en æðstu prestar sambandsins eru sagðir vera farnir að íhuga framaldið fari svo að England leggi ekki Slóveníu í lokaleik sínum í riðlakeppninni.

Það væru svo sannarlega mikil tíðindi enda framlengdi Capello samningi sínum við sambandið fram yfir lokakeppni EM 2012 í byrjun mánaðarins.

Enska landsliðið hélt krísufund í gær þar sem loftið var hreinsað í herbúðum félagsins eftir hörmulega byrjun á mótinu. Hermt er að óeining sé innan leikmannahópsins.

Fari svo að England komist ekki upp úr riðlinum yrði það í fyrsta skipti síðan 1958 sem slíkt gerist. Það yrði gríðarlegt áfall fyrir enska enda telja þeir sig hafa lið í höndunum sem geti farið alla leið.