Enginn krísufundur hjá Englandi?

Leikmenn enska landsliðsins stefndu á að halda fund í gær þar sem átti að hreinsa loftið í herbúðum liðsins. Óstaðfestar fregnir herma að Fabio Capello landsliðsþjálfari hafi komið í veg fyrir að fundurinn væri haldinn. Enska knattspyrnusambandið hefur ekkert gefið frá sér um málið.

Ráðamenn innan enska landsliðsins eru sagðir hafa tjáð John Terry, sem lýsti því yfir að liðið ætlaði að ræða málin, að slíkur fundir myndi ekki fara vel í Capello. Terry hafði áður sagt að reyndustu leikmenn liðsins hefðu farið yfir málin yfir einum bjór. Hann sagði þá vilja ræða málin við Capello og koma á framfæri þeirra hugmyndum um liðið.

"Við viljum ræða málin við hann en ef það í skapið á honum þá get ég ekki látið það koma mér úr jafnvægi. Við erum komnir hingað til þess að standa okkur fyrir England. Ef við getum ekki verið heiðarlegir hver við annan þá getum við allt eins verið heima hjá okkur," sagði Terry.

"Slíkir fundir hafa virkað vel hjá Chelsea í gegnum tíðina. Það þurfa allir að axla sína ábyrgð innan hópsins," sagði Terry en hann viðurkenndi einnig að það hefði vantað upp á samstöðuna hjá enska landsliðinu á mótinu og leikmenn kvörtuðu yfir því að hafa lítið að gera.

Terry sagði þó jákvætt að Capello hefði leyft þeim að fá sér bjór á föstudag. Það hafði hann ekki áður gert síðan hann tók við liðinu.