Robben ákveður sjálfur hvort hann geti spilað

Bert van Marwijk, landsliðsþjálfari Hollands, segir að Arjen Robben muni sjálfur ákveða hvort hann sé leikfær fyrir leik Hollendinga gegn Kamerún á fimmtudag.

Robben hefur verið frá vegna meiðsla sem hann hlaut í æfingaleik með Hollandi þann 5. júní síðastliðinn en æfði í fyrsta sinn af fullum krafti með landsliðinu í gær.

„Ég ætla að leyfa honum sjálfum að taka þessa ákvörðun," sagði van Marwijk. „Hann veit best sjálfur hvernig hans líkami er og hann mun láta mig vita þegar hann er tilbúinn."

Holland er þó þegar búið að tryggja sér sæti í 16-liða úrslitum keppninnar en liðið vann Danmörku og Japan í fyrstu tveimur umferðum riðlakeppninnar.