Kórverk Kjartans flutt í New York

„Þetta getur verið djöfulsins vesen en þetta getur verið gaman stundum,“ segir Kjartan Sveinsson, hljómsborðsleikari Sigur Rósar, um kórtónlistina sem hann hefur verið að semja í allt sumar.

Tvö verk eftir hann verða flutt í kirkju Páls postula í New York 15. nóvember. Fyrra verkið er fyrir breska karlakvartettinn The Hilliard Ensemble og það síðara er fyrir þjóðarkór Lettlands. Tónleikarnir eru liður í tónlistarhátíðinni White Light Festival sem Lincoln Center í New York stendur fyrir. Þar er megináhersla lögð á tengsl tónlistar og andlegra málefna. Seinni hluti kvöldsins er í höndum hljómsveitarinnar Riceboy Sleeps sem Jónsi úr Sigur Rós og kærastinn hans Alex Somers skipa.

Kjartan hlakkar til að koma fram á hátíðinni en tekur fram að hann hafi enn ekki lokið við verkin og því séu þau ekki alveg fullmótuð. Hann hefur unnið við þau í sumar, enda haft góðan tíma aflögu á meðan Jónsi hefur verið í tónleikaferð um heiminn til að fylgja eftir plötu sinni Go. Sigur Rós hefur fyrir vikið verið í pásu en heldur áfram að vinna að nýrri plötu eftir áramót.

Kjartan hefur á ferli sínum unnið töluvert einn á báti. Hann samdi tónlistina við stuttmyndirnar Síðasti bærinn, sem var tilnefnd til Óskarsverðlauna, og Plastic Bag eftir bandaríska verðlaunaleikstjórann Ramin Bahrani. Einnig samdi hann tónlistina við kvikmyndina Ondine eftir írska leikstjórann Neil Jordan með Colin Farrell í aðalhlutverki. Kjartan starfar einnig sem upptökustjóri og hefur meðal annars tekið upp báðar plötur Ólafar Arnalds. -fb