Í nafnastríði við nágrannana og neituðu að spila við þá

Tvö tékknesk úrvalsdeildarfélög eru í nafnstríði þessa dagana og það gekk svo langt að annað þeirra neitaði að spila þegar þau áttu að mætast í deildinni á dögunum. Tékkneska sambandið varð því að dæma leikinn tapaðan 3-0 er hálfgerður dauðadómur fyrir liðið sem er í slæmum málum í fallbaráttunni.

Bæði liðin hafa aðsetur í höfuðborginni Prag og kenna sig við Bohemians. FC Bohemians Prag neitaði að spila leikinn á móti nágrönnum sínum í Bohemians 1905 og hélt því fram að Bohemians 1905 liðið væri ekki löglegur meðlimur í tékkneska knattspyrnusambandinu.

FC Bohemians Prag er í neðsta sæti deildarinnar átta stigum frá öruggu sæti en staðan er öllu skárri hjá Bohemians 1905 sem hefur náð í ellefu stigum meira og er í 12. sæti af 16. liðum.

FC Bohemians Prag hét áður FC Strízkov Prag 9 en keypti réttinn á FC Bohemians nafninu fyrir fimm árum þegar gamla FC Bohemians liðið hafði farið á hausinn sama ár.

Gamla FC Bohemians hóf keppni í 3. deildinni og harðir stuðningsmenn hjálpuðust við að borga upp skuldirnar. Liðið tók upp nafnið Bohemians 1905 í virðingaskyni við stofnár félagsins og vann sig upp í efstu deild á nokkrum árum.

Liðin eru eitt af fjórum liðum frá Prag í deildinni en Sparta Prag er á toppnum og Slavia Prag er um miðja deild. Fimmta Prag-liðið, Dukla Prag er síðan í b-deildinni.