Handrukkar pabba Ólafs Ragnars í auglýsingu

„Þetta var algjör snilld, geðveikt gaman," segir Þorgeir Gunnarsson, eða Toggi. „Ég væri alveg til í að gera þetta oftar."

Toggi verður brátt einn frægasti dvergur landsins því nýverið lék hann í sjónvarpsauglýsingu um smálán í leikstjórn popparans Björns Jörundar Friðbjörnssonar. Hún verður frumsýnd í vor og á vafalítið eftir að vekja mikla athygli. Þar er Toggi í hlutverki handrukkara sem krefur pabba Ólafs Ragnars úr Fangavaktinni um greiðslu, sem Júlíus Brjánsson túlkar rétt eins og í þáttunum.

Þrátt fyrir að leikurinn í auglýsingunni sé að baki hefur hinn smái en knái Toggi ekki sagt skilið við skemmtanabransann því nýlega fékk hann starf á skemmtistaðnum Sódóma Reykjavík eftir að hafa áður starfað á leikskóla. Á Sódómu nýtur hann sín mjög vel og er bara sáttur við Guð og menn. „Ég er ekkert að fara að hætta þarna. Ég er að tína saman glös og bara það sem er hægt að gera á bar, ég er í því öllu," segir hann og áréttar að smæð sín hái sér ekkert í starfinu. „Ef það er eitthvert vandamál bjarga ég mér með stól eða einhverju. Á barborðinu þar sem starfsmennirnir eru við barinn er búið að raða rauðum kókkössum þar sem ég hleyp eftir eða stend upp á, þannig að ég næ alls staðar upp á barborðið."

Starfið á Sódómu fékk hann þegar hann fór þangað eitt kvöldið að skemmta sér. „Ég labba þarna inn og mæti Eyfa og Össuri [eigendum staðarins] í stiganum. Þeir spyrja hvað ég heiti og spyrja síðan hvort ég vilji vinnu og ég þigg það." segir Toggi, sem í ofanálag skartar tveimur húðflúrum. Áletrun nýrra húðflúrsins er Crazy like a fox, hvorki meira né minna. „Ég er alveg snargeggjaður," viðurkennir hann og hlær.

Togga er alls ekkert illa við að vera kallaður dvergur og reynir bara að gera gott úr hlutunum. „Ég geri alltaf grín að sjálfum mér. Það er ekkert gaman að því að vera svona ef maður hefur ekki húmor fyrir þessu."

freyr@frettabladid.is