MARS-ROKK: Engin þörf fyrir sæti

Það var rafmögnuð stemmning á lokarokktónleikum NFS þetta skólaárið - Mars-rokki 2010. Frá því í október hefur NFS boðið nemendum upp á rokktónleika í hverjum mánuði og var því tekið upp á því að enda önnina á tveimur vinsælustu hljómsveitum landsins - Hjálmum og Diktu.

Dikta var fyrst á svið og reif upp stemmninguna með laginu ,,From now on," og viðhéldu fjörinu með hverjum smellinum á fætur öðrum.

Þá næst steig framlag FS-inga til Söngkeppni framhaldsskólanna á svið með lagið ,,Á vængjum englanna." Eyrún Ösp Ottósdóttir flytur lagið en henni til aðstoðar er Bjarki Már Viðarsson, Kristjón Guðmundsson og Karen Lind Óladóttir.

Vanalega eru rokkkvöldin haldin á skemmtistöðum bæjarins, en í þetta skiptið voru tónleikarnir haldnir í hinu glæsilega og nýuppgerða Andrew's-leikhúsi á Ásbrú. Það virtist engin áhrif hafa, vegna þess að þegar suðurnesjasveitin Hjálmar var klöppuð upp í þriðja skiptið, reis fólk úr sætum sínum og dansaði með næstu þremur lögum, eða þar til sveitin þakkaði fyrir kvöldið.

,,Þetta var algjörlega magnað. Þegar Hjálmar tóku ,,Taktu þessa trommu" og allir hlupu upp að sviðinu til að dansa, þá fékk ég gæsahúð," segir Birgir Ólafsson, formaður skemmtinefndar.



Þessi frétt er skrifuð af fulltrúa FS fyrir Skólalífið á Vísi.