Sex á Havaríi

Enn heldur fjörleg myndlistarstarfssemin áfram í Havaríi í Austurstrætinu. Í dag opnar sýning sex ungra kyndilbera íslensku myndlistarsenunnar.

Sexmenningarnir eiga það nær allir sameiginlegt að hafa látið til sín taka á öðrum sviðum listarinnar. Það er eiginlega bara Davíð Örn Halldórsson, sem hefur einbeitt sér að myndlistinni. Hans stóru litríku málverk hafa slegið í gegn að undanförnu. Nú má einnig sjá verk eftir hann á sýningunni Ljóslitlífun í Hafnarhúsinu. Þetta er í annað sinn sem hann sýnir í Havaríi.

Elín Hansdóttir er sístækkandi nafn í hinum alþjóðlega listaheimi. Innsetningar hennar vekja athygli hvert sem þær fara. Eflaust kannast margir við við Elínu úr kvikmynd Dags Kára Sigurðssonar; Nóa albínóa, en þar lék hún sjoppustelpuna Írisi.

Kvikmyndatengsl má einnig finna í Bjarna Massa. Hann er einn af meðlimum kvikmyndagrúppunnar Lortur. Massinn er þekktur fyrir ást sína á landsbyggðinni og nú er það Flateyri sem kallar. Fannst Massanum viðeigandi að henda upp nokkrum verkum til að minna á sig áður en hann lætur sig hverfa vestur í nokkra mánuði.

Pétur Már Gunnarson er einn af heilunum á bakvið DVD tímaritið Rafskinnu. Hann sýnir skúlptúra og myndir.

Þá eru það poppararnir. Egill Sæbjörnsson átti stórleik á síðasta ári. Gaf út plötu og hélt stóra einkasýningu í Listasafni Reykjavíkur. Þá kom út bók um verkin hans og RÚV sýndi heimildarmynd um hann í desember. Hann sýnir fótósjoppaðar ljósmyndir af sjálfum sér á baðströndum.

Örvar Þóreyjarson Smárason er öllu þekktari fyrir framlag sitt til íslenskrar dægurtónlistar, enda í múm og FM Belfast. Teikningar eftir Örvar hafa birst í bókum, á plötuumslgöum og á sýningum víða um heim. Og nú sýnir hann í Havaríi.- drg