Fagstjóri úthúðar kjólum Evu Maríu og Ragnhildar

„Það skortir einfaldlega fagmennsku í þetta og á það var ég að benda," segir Linda Björg Árnadóttir, fagstjóri fatahönnunarbrautar Listaháskóla Íslands. Hún sendi íslensku sjónvarpskonunni Evu Maríu Jónsdóttur bréf eftir úrslitakvöld Söngvakeppni sjónvarpsins, laugardaginn 6. febrúar, en í bréfinu fullyrti Linda að kjólar Evu Maríu og Ragnhildar Steinunnar væru þeir ljótustu sem hún hefði séð í sjónvarpinu.

„Þau hjá RÚV bera ekkert skynbragð á því hvað er gott þegar kemur að sjónlistum. RÚV hefur ákveðna ábyrgð og því ber að sýna fagmennsku og kynna það besta sem er í gangi hverju sinni en þarna var einfaldlega hið gagnstæða gert," segir Linda og bætir því við að þetta sé ekki hennar persónulega álit heldur væri bréfið byggt á faglegum forsendum.

„Þetta snýst ekki bara um fatahönnunina heldur eru bæði leikmyndirnar sem RÚV notast við og förðunin ljót og hallærisleg," segir Linda.

Umræddir kjólar sem þær Ragnhildur og Eva Maríu klæddust voru hannaðir af Birtu Björnsdóttur sem á og rekur verslunina Júníform. Í yfirlýsingu sem Birta sendi Fréttablaðinu kemur fram að kjólarnir hafi fengið mjög jákvæða umfjöllun, meðal annars í færeysku dagblaði:

„…þar sem fjallað var um hve miklu betur íslensku kynnarnir litu út heldur en þeir dönsku," segir í yfirlýsingu Birtu. „Ef til vill hefðum við betur fylgt danska fordæminu og verið í „nýjustu tísku". Það kemur mér spánskt fyrir sjónir að aðjúnkt og fagstjóri við Listaháskóla Íslands komi fram í fjölmiðlum, með sterka sleggjudóma sem þessa á íslenskan fatahönnuð, faglærðan eða ekki. Hönnuð sem rekið hefur merki á Íslandi í þetta langan tíma við sívaxandi vinsældir. Það væri nú eflaust áfall fyrir hana Lindu að vita hve margir kaupa hönnun júniform og kannski áttar hún sig þá á eigin hroka, í garð fatasmekks íslensku þjóðarinnar. Ég vísa nú þessari gagnrýni hennar aftur til föðurhúsanna, gagnrýni sem greinilega ber sterkan keim af biturð hennar, sökum þess að hennar nemendur fengu ekki verkið."

freyrgigja@frettabladid.is