Fleiri umsóknir en í síðasta Idoli

„Þetta voru engar ruglumsóknir. Við fengum góð viðbrögð frá alvörufólki,“ segir sjónvarpsmaðurinn og verðandi veitingamaðurinn Sigmar Vilhjálmsson.

Félagarnir Sigmar og Jóhannes Ásbjörnsson, Simmi og Jói, stefna á að opna Hamborgarafabrikkuna í mars og auglýstu nýlega eftir starfsfólki. Sigmar segir viðbrögðin hafa verið vægast sagt góð og að fleiri hafi sótt um en mættu í síðustu Idol-áheyrnarprufur. „0,1% þjóðarinnar sótti um hjá okkur og einn útlendingur,“ segir hann og útskýrir nánar: „320 manns sóttu um í sirka 20 störf. Við vorum í fimm daga að fara í gegnum umsóknirnar og loksins núna erum við að ná að svara öllum sem við viljum fá í viðtal.“

Eins og fram hefur komið í Fréttablaðinu hafa myndbandsupptökuvélar fylgt Simma og Jóa í gegnum undirbúning opnunar Hamborgarafabrikkunnar. Úr verður raunveruleikaþáttur sem sýndur verður á Stöð 2 í vor. Þeir sem hafa verið boðaðir í starfsviðtal þurfa að þrá starfið að sögn Simma, þar sem myndavélarnar taka á móti þeim. „Við erum hugsanlega að fara að stilla upp áheyrnarprufum,“ segir hann í léttum dúr. „Við boðum fólk að öllum líkindum á Loftleiðir í viðtal.“ Þegar Simmi sleppir orðinu heyrist í Jóa fyrir aftan: „Við erum samt ekki að fara að sýna frá því sem þau segja í atvinnuviðtalinu.“

Simmi segir fjölbreytta flóru fólks hafa sótt um og það er kannski til marks um ástandið í þjóðfélaginu að nokkrir viðskiptafræðingar eru á meðal umsækjenda. „Þetta er fólk sem var kannski að vinna á veitingastað fyrir átta árum síðan,“ segir hann. „Svo sótti fólk um sem er að vinna annars staðar í dag og vill einfaldlega breyta til.“ - afb