Björn spilar í Japan

Gítarleikaranum Birni Thoroddsen hefur verið boðið að leika með japanska gítarleikaranum Kazumi Watanabe um páskana. Tónleikarnir verða á einum þekktasta djassklúbbi Tókíó, Shinjuku Pit Inn. Watanabe, sem er einn þekktasti djassleikari Japans, heldur upp á fjörutíu ára starfsafmæli sitt í ár.

Af því tilefni býður hann til leiks mörgum af bestu gítarleikurum heims og er því um mikinn heiður að ræða fyrir Björn að vera á meðal þeirra. Björn hefur farið nokkrum sinnum til Japans með hljómsveitinni Guitar Islancio og hefur ein plata verið gefin þar út í samstarfi við Zonet-útgáfuna.

Hann gaf á dögunum út plötuna Gítarveisla Bjössa Thor sem er hljóðritun frá tónleikum sem voru haldnir nýlega í Salnum. Þar komu fram margir fremstu gítarleikarar þjóðarinnar og spiluðu óskalög sín.