Spánverjar enn á beinu brautinni - öll úrslit kvöldsins

Fjölmargir leikir fóru fram í undankeppni EM 2012 í kvöld en í þeim síðasta unnu heimsmeistarar Spánverja öruggan 3-1 sigur á Litháen á heimavelli.

Spánn komst yfir með marki Fernando Llorente í upphafi síðari hálfleiks en Darvydas Sernas jafnaði óvænt metin fyrir gestina aðeins sjö mínútum síðar.

Heims- og Evrópumeistararnir voru þó ekki lengi að ná forystunni á ný er Llorento skoraði öðru sinni tveimur mínútum síðar.

David Silva innsiglaði svo sigurinn með þriðja marki Spánverja á 79. mínútu.

Meðal annarra úrslita má nefna að Þýskaland vann góðan sigur á Tyrklandi í A-riðli, 3-0, á Ólympíuleikvanginum í Berlín. Það var þó ekki að sjá að leikurinn hafi farið fram í Þýskalandi þar sem fjölmargir stuðningsmenn Tyrkja á vellinum létu vel í sér heyra allan leikinn.

Miroslav Klose heldur áfram að raða inn mörkunum fyrir þýska landsliðið en hann gerði tvö í kvöld. Mesut Özil, sem er af tyrkneskum ættum en er fæddur í Þýskalandi, skoraði einnig en fagnaði ekki marki sínu.

Í B-riðli komust Rússar í 3-0 forystu gegn Írum á Írlandi. Heimamenn náðu að skora tvívegis undir lok leiksins en nær komust þeir ekki.

Gengi Ítala var afleitt á HM í Suður-Afríku í sumar og ekki skánaði það í Norður-Írlandi í kvöld. Þar mættu Ítalar heimamönnum í C-riðli og máttu sætta sig við markalaust jafntefli.

Hollendingar voru óheppnir að ná aðeins 1-0 útisigri gegn Moldóvu í kvöld. Klaas-Jan Huntelaar skoraði eina mark leiksins en Hollendingar sóttu linnulaust. Markvörður Moldóva, Stanislav Namasco, átti stórleik og kom í veg fyrir að mörkin yrðu fleiri í leiknum.

Lothar Matthäus fór vel af stað sem landsliðsþjálfari Búlgaríu. Hann stýrði sínum mönnum til 1-0 útisigurs gegn Wales í kvöld en liðin leika í G-riðli.

Í I-riðli fóru fram tveir leikir í kvöld. Tékkar unnu öflugan 1-0 sigur á Skotum og Spánverjar unnu Litháa, sem fyrr segir.

Úrslit kvöldsins:



A-riðill:

Kasakstan-Belgía 0-2

Austurríki-Aserbaídsjan 3-0

Þýskaland-Tyrkland 3-0

1-0 Miroslav Klose (42.)

2-0 Mesut Özil (79.)

3-0 Miroslav Klose (87.)



B-riðill:

Armenía-Slóvakía 3-1

Andorra-Makedónía 0-2

Írland-Rússland 2-3

0-1 Alexander Kerzhakov (11.)

0-2 alan Dzagoev (29.)

0-3 Roman Shikorov (50.)

1-3 Robbie Keane, víti (72.)

2-3 Shane Long (78.)

C-riðill:

Serbía-Eistland 1-3

Norður-Írland-Ítalía 0-0

Slóvenía-Færeyjar 5-1

D-riðill:

Lúxemborg-Hvíta-Rússland 0-0

Albanía-Bosnía 1-1

E-riðill:

Ungverjaland-San Marínó 8-0

Moldóva-Holland 0-1

0-1 Klaas-Jan Huntelaar (37.)

F-riðill:

Georgía-Malta 1-0

Grikkland-Lettland 1-0

G-riðill:

Svartfjallaland-Sviss 1-0

Wales-Búlgaría 0-1

H-riðill:

Kýpur-Noregur 1-2

0-1 John Arne Riise (2.)

0-2 John Carew (42.)

1-2 Ionnis Okkas (58.)

Portúgal-Danmörk 3-1

1-0 Nani (29.)

2-0 Nani (31.)

2-1 Ricardo Carvalho, sjálfsmark (79.)

3-1 Cristiano Ronaldo (85.).

I-riðill:

Tékkland-Skotland 1-0

1-0 Roman Hubnik (70.)

Spánn-Litháen 3-1

1-0 Fernando Llorente (47.)

1-1 Darvydas Sernas (54.)

2-1 Fernando Llorente (56.)

3-1 David Silva (79.)