Skítblönk í kreppunni

Stuttmynd Brynju Valdísar leikkonu, Einu sinn var… verður endursýnd vegna fjölda áskorana á Skjá einum kl. 19.00 í opinni dagskrá í kvöld.

„Þetta er létt mynd með glöðu yfirbragði,“ segir Brynja. „Hún er litrík og stílfærð bæði í leik og útliti og mikið fyrir augað. Ég hef alltaf haft mjög gaman af myndum Mel Brooks og myndum eins og Airplane og Naked Gun-myndunum og þess gætir í Einu sinni var…“

Myndin fjallar um Regínu Ínu (leikin af Arnbjörgu Hlíf Valsdóttir), sem er saklaus sveitastúlka sem ákveður að hefja nýtt líf og flytur í borgina. Hún er skítblönk í kreppunni og leitar athvarfs hjá Guddu frænku sinni. Lífið er enginn dans á rósum en það breytist í borginni þar sem ævintýrin gerast enn. Önnur hlutverk leika meðal annars Benedikt Erlingsson og Laddi.

Einu sinni var… er útskriftarverkefni Brynju Valdísar af leikstjórnar- og framleiðslusviði Kvikmyndaskóla Íslands og Eyrúnar Helgu Guðmundsdóttur af tæknisviði Kvikmyndaskóla Íslands.