Dylan fær ekki að spila í Kína - hertar reglur vegna Bjarkar

Tónlistarmaðurinn Bob Dylan hefur aflýst fjölmörgum tónleikum í Asíu til að mótmæla því að hann fær ekki að koma fram í Kína.

Samkvæmt upphaflegri áætlun ætlaði Dylan að halda tónleika í Hongkong, Shanghai, Beijing og Taiwan. Kínversk stjórnvöld gáfu Dylan hins vegar ekki leyfi til þess að koma fram á meginlandi Kína. Hann ákvað því að aflýsa öðrum tónleikum líka, segir Sunday Morning Post.

Menningarmálaráðuneytið í Kína hefur hert reglur um tónleikahald erlendra tónlistarmanna í landinu, eftir að Björk Guðmundsdóttir söngkona lýsti yfir stuðningi við sjálfstæði Tíbeta á tónleikum í Shanghai fyrir tveimur árum síðan, segir Ritzau fréttastofan.