Ballettinn kom í stað Bandaríkjahers

Bryn Ballett Akademían er dansskóli í Reykjanesbæ sem býður meðal annars upp á nám í klassískum ballett, nútímadansi og jassballett. Stofnandi skólans er danskennarinn Bryndís Einarsdóttir sem kenndi í mörg ár í Los Angeles auk þess sem hún hefur kennt dans í Englandi og Japan.

„Ég er upprunalega úr Njarðvík en var búsett erlendis í fimmtán ár þar til ég flutti aftur heim fyrir tveimur árum. Ég byrjaði mjög ung að kenna við Dansstúdíó Sóleyjar og var einnig dugleg að sækja ýmis dansnámskeið út. Ég flutti svo út til Los Angeles og kenndi þar við ýmsa listdansskóla auk þess að hafa kennt við Lee Strasberg-leiklistarskólann," útskýrir Bryndís og segir kærasta sinn vera ástæðuna fyrir því að hún flutti heim á ný.

„Ég kynntist kærasta mínum í Englandi. Hann er jurtalæknir og var afskaplega hrifinn af Íslandi og vildi endilega flytja hingað. Mig langaði aftur á móti að flytja til Frakklands og rækta ávexti og kenna ballett. Hann hélt áfram að suða í mér og á endanum gaf ég mig og nú erum við búin að vera hér í næstum tvö ár."

Bryndís telur að koma dansskólans hafi ýtt undir dansáhuga barna og ungmenna í bænum og eru nemendur við skólann nú orðnir um tvö hundruð talsins. Skólinn er á gamla varnarsvæðinu, í stórum bröggum sem áður hýstu skotfærageymslu Bandaríkjahers.

„Þetta er mjög skemmtilegt húsnæði en við létum blessa það í bak og fyrir áður en við tókum húsið í notkun svona til að fá góðan anda hingað inn," segir Bryndís og hlær.

Hægt er að kynna sér stundaskrá dansskólans á vefsíðunni www.bryn.is. - sm