Rooney brjálaður yfir baulinu í gær

Enska pressan tók liðið sitt nánast af lífi eftir jafntefli þeirra við Alsír í gær. Leikur liðsins olli gríðarlegum vonbrigðum heima fyrir. "Sorglegt," - "Ömurlegt" - "Þeir vita ekkert hvað þeir eru að gera," var meðal þess sem ensku dagblöðin slógu upp í morgun. Baulað var á enska liðið þegar það gekk af velli og leikmenn liðsins tóku því misjafnlega. Gareth Barry sagði það eðlilegt en Wayne Rooney, sem hefur líklega ollið hvað mestum vonbrigðum í leik Englendinga en hann hefur verið skelfilegur í báðum leikjunum, brást ókvæða við. "Mjög gaman að heyra sína eigin stuðningsmenn baula á þig. Ef þetta er almennilegur stuðningur… andskotinn hafi það," sagði Rooney í sjónvarpsmyndavél eftir leikinn í lauslegri íslenskri þýðingu.