Slasaðist í Prince Of Persia

Leikarinn Jake Gyllenhaal slasaðist oft og mörgum sinnum við tökur á hasarmyndinni Prince Of Persia: The Sands Of Time. Hann lét það ekki á sig fá því hann var staðráðinn í því að framkvæma sjálfur áhættuatriðin sín. „Ég tognaði í öxlunum og í bakinu og rústaði á mér ökklann nokkrum sinnum en það var ekkert alvarlegt," sagði hinn 29 ára Gyllenhaal.

„Í einu atriði kýldi ég fyrir mistök einn náunga í andlitið. Ég reyndi það sem eftir var atriðisins að reyna að kýla hann ekki aftur."

Ekki kemur fram hvort þar hafi verið um Gísla Örn Garðarsson að ræða en hann fer með hlutverk í myndinni, sem verður frumsýnd í sumar.