Kenna ungu fólki að elda fisk

Sveinn Kjartansson, eigandi Fylgifiska, og Áslaug Snorradóttir ætla að kenna Íslendingum að elda fjölbreytta fiskrétti í nýjum sjónvarpsþáttum sem sýndir verða á RÚV.

„Þessi hugmynd spratt upp úr rannsókn sem MATÍS vann og leiddi það í ljós að fólk á aldrinum 18-25 ára borðar sirka einn munnbita af fisk á viku,“ segir Margrét Jónasdóttir en hún framleiðir nýja sjónvarpsþætti sem sýndir verða á RÚV og eiga að leiða fólk í allan sannleika um hvernig sé hægt að matbúa fisk á fjölbreyttan hátt. Áslaug Snorradóttir, matgæðingur og ljósmyndari, og Sveinn Kjartansson, eigandi Fylgifiska, verða stjórnendur þáttarins en það er Hrafnhildur Gunnarsdóttir sem leikstýrir þeim. Þættirnir verða alls átta og eru 25 mínútna langir.

Áslaug og Sveinn voru á leiðinni í Hvalfjörðinn þegar Fréttablaðið náði tali af þeim en þar ætluðu þau að tína krækling. „Vonandi verða þessir þættir til þess að fólk fari að borða meiri fisk,“ segir Áslaug sem þykir nauðsynlegt að benda á aðrar eldunaraðferðir fisksins en að sjóða hann í pott eða steikja upp úr raspi. Áslaug telur raunar sorglegt hversu lítið Íslendingar borði fisk og rifjar í því sambandi upp litla dæmisögu um íslenskan námsmann sem bjó með fjölþjóðlegu liði á háskólaárum sínum erlendis.

„Allir elduðu sinn þjóðarrétt og biðu spenntir eftir því að fá að smakka einhvern framandi fiskrétt frá henni en hún kunni ekkert að matreiða slíkt og skammaðist sín hálfpartinn fyrir það,“ segir Áslaug og vonar að það eigi eftir að breytast með þessum þáttum.

Íslendingar hafa löngum hreykt sér af því að vera mikil fiskiþjóð en Áslaug bendir á að við borðum lítinn fisk.

„Við snobbum svo mikið fyrir útlöndum, þetta tímabil krókódílakjöts og kengúra er búið, það er fínt að fá sér krókódílakjöt í Flórída og kengúrulæri í Ástralíu en við eigum ekkert að þurfa að flytja þennan mat inn,“ segir Áslaug og bætir því við að Íslendingar séu tiltölulega nýbyrjaðir að elda og hafa gaman af því að borða. „Það er fyrst núna sem það er að skapast einhver stemning í kringum matarvenjur.“

freyrgigja@frettabladid.is