Hann var snöggur að öllu

„Ég er farinn að viða að mér efni og draga saman staðreyndir sem gott er að hafa á hreinu áður en maður byrjar að taka viðtöl,“ segir Jónatan Garðarsson, sem skrifar ævisögu tónlistarmannsins Karls Sighvatssonar. Karl spilaði meðal annars með Trúbroti og Þursaflokknum, en lést sviplega í bílslysi á Hellisheiði fjörutíu ára gamall árið 1991.

„Það hefur eiginlega ekkert verið skrifað um Karl,“ segir Jónatan. „Hann var mjög ungur þegar hann byrjaði í tónlistinni. Var ekki nema 10 ára þegar hann stofnaði fyrstu hljómsveitina upp á Skaga. Svo var hann í hljómsveit í Reykholti en fljótlega eftir að hann kom til Reykjavíkur var hann byrjaður í böndum. Fyrst smá tíma í Tónum, þá í Dátum og svo stofnaði hann Flowers. Svo er sú saga þekkt hvernig hann fór yfir í Trúbrot og svo úr og í bandið. Skólagangan hjá honum var gloppótt. Hann fór í nám til Austurríkis og var þar í tæp tvö ár og svo löngu seinna í skóla í Berkeley í Kaliforníu. Hann var svo starfandi sem organisti fyrir austan fjall þegar hann lést.“

Þeir Jónatan og Karl þekktust ágætlega. „Við áttum samskipti á ýmsum sviðum í gegnum tíðina. Þegar ég stofnaði Jazzvakningu með öðrum kom hann oft á djasskvöld og djammaði. Eftir að ég fór í plötuútgáfubransann tengdist ég honum og eins þegar ég starfaði sem blaðamaður. Ég myndi lýsa honum þannig að hann var snöggur að öllu. Hann var kvikur og ör og vinmargur, fór víða um og stoppaði yfirleitt stutt. Á föstudeginum áður en hann dó kom hann til mín á skrifstofuna. Ég var á fundi svo hann sagðist ætla að koma aftur á mánudaginn og ræða málin. Hann ætlaði að koma með einhverja hugmynd. Svo frétti ég bara af því á sunnudagskvöldinu að hann væri dáinn.“

Bókin um Karl Sighvatsson er fyrsta „rokkbókin“ sem heyrist af í ár. Í fyrra var mikil sprenging í þessari tegund bókmennta þegar ævisögur um menn eins og Magnús Eiríksson og Vilhjálm Vilhjálmsson komu á markaðinn, auk bókarinnar 100 bestu plötur Íslandssögunnar, sem Jónatan skrifaði með Arnari Eggerti Thoroddsen. Það var fyrsta bókin sem Jónatan skrifaði, en hann hefur skrifað mikið um tónlist á plötukápur og í dagblöð. Æskan gefur bókina um Karl út í haust.

drgunni@frettablaðið.is