Innri sýn Bjargar

Í listasal Garðabæjar á Garðatorgi 7 stendur nú yfir sýning Bjargar Atla, sem hún nefnir Tilbrigði við stef. Listasalur Garðabæjar er lítill sýningarsalur staðsettur á hæðinni fyrir ofan Bókasafn Garðabæjar og hýsti áður sýningasal Hönnunarsafns Íslands.

Í verkum sínum velur Björg að nota aðferð vatnslitatækninnar og leitast við að ná fram flæði, gagnsæi og tærleika. Hún er heilluð af því að rannsaka áhrif lita og litaandstæðna í myndfletinum.

Myndir hennar eru ekki málaðar eftir beinum fyrirmyndum, heldur tjá í þöglum tónum innri sýn.

Björg hefur haldið nokkrar einkasýningar, síðast í Hafnarborg í Hafnarfirði 2004, og tekið þátt í samsýningum, þar á meðal tveimur sýningum listamanna í Garðabæ árið 2009.

Sýningin er opin frá kl. 13 til 18 og stendur til 28. febrúar.