Thomas Müller ætlar að spila í treyju númer 13 eins og Gerd Müller

Þjóðverjinn Thomas Müller ber ekki bara eftirnafn mesta markaskorara þjóðarinnar og spilar með sama liði (Bayern München) heldur ætlar hann að bera sama númer á HM í Suður-Afríku og Gerd Müller skoraði 14 mörk í 13 leikjum á HM 1970 og 1974.

Michael Ballack hefur spilað í treyju númer þrettán í undanförnum stórmótum Þjóðverja en hann missir af HM vegna meiðsla sem hann varð fyrir í síðasta leik Chelsea á tímabilinu.

Thomas Müller verður 21 árs gamall í september en hann átti flott tímabil með Bayern München sem vann tvöfalt í Þýskalandi. Müller skoraði 19 mörk í 52 leikjum í öllum keppnum á tímabilinu þar af var hann með 13 mörk og 11 stoðsendingar í 34 deildarleikjum.

Thomas Müller hefur aðeins spilað einn landsleik fyrir Þjóðverja en Gerd Müller var 24 ára gamall og búinn að leik 19 landsleiki og skora 17 landsliðsmörk þegar hann mætti í fyrsta leik á HM í Mexíkó 1970.

Gerd Müller skoraði alls 68 mörk í 62 landsleikjum og tryggði Vestur-Þjóðverjum heimsmeistaratitilinn í sínum síðasta landsleik sem var úrslitaleikurinn á HM 1974.