Föstuorgel í Grindavík

Á morgun, öskudag, hefst föstu-tónleikaröðin Leyndardómur trúarinnar í Grindavíkurkirkju. Sex tónleikar fara fram næstu sex miðvikudagskvöld. Eyþór Ingi Jónsson, organisti Akureyrarkirkju, ríður á vaðið annað kvöld og leikur verk eftir „Bé-in þrjú“, Buxtehude, Böhm og Bach, ásamt því að spinna á orgelið.

Eyþór, líkt og aðrir flytjendur í þessari tónleikaröð, mun rabba við áhorfendur um verkin og höfunda þeirra á milli laga. Þeir sem koma fram á eftir Eyþóri eru Guðný Einarsdóttir, Hörður Áskelsson og Inga Rós Ingólfsdóttir, Guðný Einarsdóttir, Guðmundur Sigurðsson og Gunnar Gunnarsson og fleiri.

Áhersla er lögð á að tengja tónlistina við trúarlegt inntak föstutímans auk þess sem einn passíusálmur Hallgríms Péturssonar verður tekinn fyrir á hverjum tónleikum. Tónleikarnir hefjast kl. 20 og aðgangseyrir er 1.000 kr.