Rory Fallon hefur mikla trú á sínu liði

Rory Fallon, leikmaður Nýja-Sjálands, var að vonum sáttur með stigið eftir 1-1 jafntefli liðsins gegn ríkjandi heimsmeisturum Ítala fyrr í dag. „Ég persónulega trúi því að við getum komist áfram," sagði Rory Fallon ánægður eftir leikinn á móti Ítölum. „Við getum gert enn betur og það er það fallega við okkar lið. Við trúum því að okkur takist þetta. Ég fer aldrei út á völlinn án þess að hugsa aðeins um sigur og trúi því ávalt að ég geti verið sá besti. Við erum með nógu gott til þess að komast lengra," sagði Fallon ákveðinn í leikslok.