Hæstiréttur sýknar lögmann af ákæru um fjársvik

Hæstiréttur sýknaði í dag Karl Georg Sigurbjörnsson lögmann sem ákærður var fyrir að hafa blekkt Sigurð Þórðarson, fyrrverandi ríkisendurskoðanda til að selja stofnfjárbréf í Sparisjóði Hafnarfjarðar á 25 milljónir hvert í stað 45 milljóna.

Karl Georg var ákærður fyrir að hagnýta sér „ranga hugmynd" Sigurðar um hámarkverð á bréfunum. Karl var ákærður fyrir að hafa greitt 25 milljónir fyrir hvert bréf. Félagið A. holding í Lúxemborg sem var í eigu Baugs seldi bréfin síðan á 45 milljónir hvert bréf.

Héraðsdómur hafði áður sýknað Karl Georg af sömu ákæru. Helgi Magnús Gunnarsson, saksóknari efnahagsbrotadeildar hjá Ríkislögreglustjóra, áfrýjaði málinu til Hæstaréttar.

Málinu er hinsvegar ekki alveg lokið því skiptastjóri Baugs hefur stefnt Karli Georgi fyrir Héraðsdóm Reykjavíkur vegna tíu milljón króna greiðslu sem hann fékk frá Baugi.

Litið er á greiðsluna sem gjafagjörning af hálfu þrotabús Baugs og farið fram á riftun þess vegna. Rökin eru helst þau að Baugur hafi ekki haft neina skyldu til þess að greiða Karli Georg þessa upphæð. Sjálfur á Karl Georg að hafa farið fram á þennan pening sem miskabætur fyrir þær hremmingar sem hann taldi sig hafa lent í vegna stofnfjárkaupanna og refsimálsins sem hann hefur nú verið sýknaður af.