Nani: Ferguson var reiður út í mig

Portúgalinn Nani viðurkennir að Sir Alex Ferguson hafi ekki verið par sáttur er Nani lét reka sig af velli gegn Aston Villa.

Nani fékk að líta rauða spjaldið í fyrri hálfleik fyrir tveggja fóta tæklingu á Stiliyan Petrov.

Hann fer nú í þriggja leikja bann og missir meðal annars af úrslitaleik deildarbikarsins.

„Ég talaði við stjórann í hálfleik og hann var reiður út í mig. Það er eðlilegt enda má ekki tækla svona. Ég tek fulla ábyrgð á mínum gjörðum þó svo ég hafi ekki ætlað að gera þetta," sagði Nani.

„Ég biðst afsökunar því við misstum af tækifæri til þess að komast á topp deildarinnar. Þetta er líka mjög slæmt fyrir mig því ég var að komast í mitt besta form."