Gísli Örn flottur í tauinu á stærstu frumsýningu sögunnar

Ofurframleiðandinn Jerry Bruckheimer grínast ekki þegar kemur að stórmyndum hans. Sú nýjasta, Prince of Persia, var frumsýnd í Westerfield-verslunarmiðstöðinni í London í gær. Dugði þá ekkert minna en stærsta kvikmyndafrumsýning sögunnar í Bretlandi, eða þannig kynnti Bruckheimer hana að minnsta kosti.

Gísli Örn Garðarsson var að sjálfsögðu mættur á svæðið og flottur á því, enda fer hann með hlutverk foringja Hassansin-hópsins, sem eru helstu andstæðingar Jake Gyllenhaal í myndinni.

Gísli staldrar væntanlega stutt við í London að þessu sinni þar sem Rómeó og Júlía Vesturports fer aftur á fjalirnar í Borgarleikhúsinu á morgun. Honum hefur einnig verið boðið að taka þátt í viðhafnarsýningu myndarinnar í Los Angeles 17. maí en þarf þá að vera snöggur til baka þar sem hann á að sýna í Borgarleikhúsinu daginn eftir.

Hér má sjá myndband af rauða dreglinum og skemmtiatriðunum á undan sýningunni.

Hér er stutt viðtal við Gísla tekið á tökustað þar sem hann er ennþá farðaður að hluta.