Bretar standa við bakið á Cheryl

Söngkonan Cheryl Cole flúði Bretland í vikunni eftir að fjölmiðlar greindu frá framhjáhaldi eiginmanns hennar, Ashley Cole. Breska þjóðin stendur þétt við bakið á sinni konu og hvetur hana til að skilja.

Cheryl og Ashley Cole eru meðal frægustu para Bretlands. Hann er leikmaður Lundúnaliðsins Chelsea og enska landsliðsins, hún er dómari í vinsælu þáttunum X-Factor og syngur með stúlknasveitinni Girls Aloud. En Ashley hefur hrapað hratt niður vinsældalista bresku þjóðarinnar eftir að götublaðið The Sun greindi frá framhjáhaldi hans á þriðjudaginn. Skömmu áður hafði nektarmyndum af þessum bakverði Chelsea verið lekið til fjölmiðla en þær átti hann að hafa sent til íturvaxinnar undirfatafyrirsætu. Ashley neitaði öllum sakargiftum, viðurkenndi vissulega að hafa tekið af sér myndir en einhverjir óprúttnir náungar, vinir vina hans eins og hann komst að orði, hefðu komist yfir símann og sent myndirnar.

En heldur syrti í álinn hjá Ashley þegar ung ljóshærð snót bankaði upp hjá The Sun og upplýsti í blaðaviðtali að hún hefði fengið erótísk sms-skilaboð frá knattspyrnuhetjunni og að þau hefðu átt stundargaman uppi á hótelherbergi landsliðsmannsins, oftar en einu sinni.

The Sun gerði nýverið könnun meðal lesenda sinna og niðurstaða hennar var nánast einróma; Cheryl ætti að losa sig við Ashley fyrir fullt og allt. Aðeins fimm prósent þeirra sem tóku þátt vildu að Cheryl og Ashley ættu að vinna í sínum málum. 25 prósent tóku ekki afstöðu. Málið er allt hið vandræðalegasta fyrir Chelsea og jafnvel enska landsliðið því fyrir skömmu var greint frá því að fyrirliði liðanna tveggja, John Terry, hefði verið konu sinni ótrúr með fyrrum kærustu samherja síns. Carlo Ancelotti, framkvæmdastjóri Chelsea, sagði í fjölmiðlum að honum væri sama hvar sínir menn svæfu á næturnar.

Fabio Capello var ekki á sama máli og hefur svipt John Terry fyrirliðastöðunni hjá enska landsliðinu.