Mikill metnaður í Kimono

Kimono heldur útgáfutónleika sína í Íslensku óperunni í kvöld. „Þetta eru „stærstu“ tónleikar okkar miðað við hvað við erum að leggja í þetta,“ segir Gylfi Blöndal, einn meðlima sveitarinnar. „Óperan er stórt hús, einstaklega falleg í sinni upprunalegu mynd og þessir tónleikar verða mikið sjónarspil. Aukaleikarar stíga á svið, gríðarlegt ljósasjó verður sett upp og visjúalar í þrívídd sem Hafsteinn Michael Guðmundsson listmálari og Máni M. Sigfússon vídeólistamaður (og bróðir Sindra Seabear) hafa sett saman.“

Gylfi segir bandið ætla að spila meira og minna allt sem það kann. „Við ætlum að taka langt prógramm sem saman-stendur af strengjasveit sem spilar þrjú eldri lög með okkur í upphafi tónleika, við komum svo inn í einu lagi áður en við tökum sviðið alveg yfir og leikum plötuna auk safns eldri laga. Karl Daði Lúðvíksson, bassaleikari Lights on the Highway, spilar með okkur í eldri lögum.“

Gylfi segir það nokkuð metnaðarfullt að taka Óperuna undir tónleikana. „Já, það eru ekki margar íslenskar indie-hljómsveitir sem treysta sér í Óperuna, en við vildum, eftir tæplega tíu ára feril, færa okkur yfir í stærri og íburðar-meiri tónleika. Á sama tíma viljum við sýna öðrum hvernig hægt er að gera svona metnaðarfull sjó, með von um að fleiri sveitir fylgi í kjölfarið. Í haust er hugmyndin að ferðast til Evrópu með álíka dæmi og setjum við þá stefnuna á stærri tónleikastaði, leikhús og svo framvegis.“ - drg