Jökullinn stal yfirleitt senunni

Halldór Lárusson hefur haldið úti vefsíðunni trommari.is í meira en eitt ár. Nú hefur umfjöllun um Gunnar Jökul Hákonarson dregið dilk á eftir sér og stefnt er á minningartónleika í haust.

„Tilgangurinn með síðunni var að halda úti trommunördasíðu þar sem trommarar landsins gætu komið saman og rifist yfir því hvaða kjuðar væru bestir og svoleiðis,“ segir Halldór. „Trommarar eru greinilega miklir nördar því viðtökurnar hafa verið betri en ég bjóst við. Það eru á fimmta hundrað manns innskráðir og margir af þeim eru mjög virkir á síðunni.“

Halldór er að sjálfsögðu trommari sjálfur, spilaði með Spilafíflum, Með nöktum, MX-81 og Júpiters áður en hann flutti til Hollands þar sem hann spilaði árum saman. Hann býr nú í Grindavík, kennir í þremur tónlistarskólum og leikur með gömlum félögum úr Júpiters í hljómsveitinni Lemúrar.

Eitt af því sem Halldór býður upp á á síðunni er „Trommari vikunnar“. Nýlega var Gunnar Jökull Hákonarson einn slíkur, en „Jökullinn“ er sannkölluð goðsögn í íslenskri poppsögu. Hann var trommari Trúbrots og spilaði með beat-combóinu The Syn í London á 7. áratugnum. Byrjaði þar aðeins 16 ára gamall.

„Ég vildi afla sem mestra upplýsinga um Jökulinn og það vægast sagt vatt upp á sig,“ segir Halldór. „Greinin sem er á síðunni núna er bara forsmekkurinn, því það er svo mikið búið að koma í ljós í viðbót. Það kemur önnur grein seinna. Ég talaði við forsprakka The Syn, söngvarann Stephen Nardelli, fann hann bara í ensku símaskránni. Við kjöftuðum örugglega saman í klukkutíma og það barst í tal að halda minningartónleika um Gunnar Jökul og þá vildi hann óður og uppvægur koma hingað með The Syn. Þeir byrjuðu að spila saman aftur árið 2003. Það á eftir að koma í ljós hvort hann stendur við stóru orðin, en það verða líklega haldnir minningatónleikar í september hvort sem þeir koma eða ekki.“

Bassaleikarinn Chris Squire og gítarleikarinn Pete Banks voru meðlimir í The Syn, en bandið hætti 1967 og þeir stofnuðu hljómsveitina Yes ári síðar. Þeir reyndu mikið að fá Gunnar Jökul aftur út, en hann var búinn að gefast upp á harkinu í útlöndum og missti þar með af heimsfrægðinni því Yes átti eftir að rísa í hæstu hæðir 1969. Bill Bruford trommaði í staðinn með Yes. „Það hefur aldrei komið fram áður að þegar Bill hætti í Yes árið 1972 þá reyndu þeir að fá Jökulinn í bandið en náðu bara ekki sambandi við hann,“ segir Halldór. Hann segir að margt sem Nardelli hafi sagt sér um Gunnar Jökul hafi komið á óvart. „Gunnar, Keith Moon úr The Who og Mitch Michell úr The Jimi Hendrix Experience voru til að mynda miklir félagar. The Syn og The Who túruðu oft saman og héldu djamm-sessjónir og þá stal Gunnar Jökull yfirleitt senunni.“

Einn af þeim sem hreifst af Jöklinum var Phil Collins. „Phil skrifaði í bæklinginn þegar The Syn safndiskur var gefinn út fyrir nokkrum árum og það kom upp sú hugmynd að fá hann til að koma til landsins í tilefni af minningartónleikunum. Hann myndi þó ekki tromma því hann fór í bakaðgerð fyrir nokkrum árum og hætti að geta trommað eftir það.“

Trommuleikaraferill Gunnars Jökuls rann út í sandinn þegar hann var aðeins 24 ára og verður saga hans að teljast ein sú harmrænasta í íslenskri poppsögu. Jökullinn lést fyrir aldur fram úr alnæmi árið 2001, 52 ára að aldri. Halldór trommari vonast til að af þessum löngu tímabæru minningartónleikum geti orðið í september.

drgunni@frettabladid.is