Anita á frumsýningu með Fergie

Íslenska leikkonan Anita Briem var meðal stjarnanna í Hollywood þegar kvikmyndin When in Rome var frumsýnd. Aðdáendur flykktust að stjörnunum þegar þær mættu prúðbúnar í El Capitan-kvikmyndahúsið á miðvikudaginn í síðustu viku. When in Rome hefur reyndar ekki fengið rosalega góða dóma en hún skartar Kristen Bell, sem íslenskir sjónvarpsáhorfendur ættu að kannast við úr Gossip Girls, og Josh Duhamel, eiginmanni Fergie úr The Black Eyed Peas, í aðalhlutverkum auk Anjelicu Houston og Jon Heder, nördaleikarans geðþekka úr Napeolon Dynamite og Blades of Glory.

Anita vakti mikla athygli að venju á rauða dreglinum en meðal þeirra sem sóttu frumsýninguna má nefna áðurnefnda Fergie, Miami Vice-leikarann Don Johnson og Bradley Cooper úr The Hangover. Anita er nú nýbúinn að leika í kvikmyndinni Dead of Night á móti ofurmenninu Brandon Routh en inni á opinberri heimasíðu kvikmyndarinnar, deadofnight-themovie.com/, má sjá ljósmyndir frá tökunum og meðal annars myndir af Anitu og Routh saman.

Næsta verkefni Anitu samkvæmt imdb.com er Everything Will Happen Before You Die. Dead of Night verður hins vegar frumsýnd á þessu ári.