Páll Óskar syngur með Sinfó í nóvember

„Mig langar að gera Las Vegas-sýningu með Sinfó,“ segir tónlistarmaðurinn Páll Óskar Hjálmtýsson.

Páll Óskar kemur fram ásamt Sinfóníuhljómsveit Íslands í nóvember næstkomandi. Páll hyggst flytja mörg af vinsælustu lögum sínum ásamt þessari stærstu hljómsveit landsins, en þeir Þórir Baldursson, Haraldur Vignir Sveinbjörnsson og Samúel Jón Samúelsson, betur þekktur sem Sammi í Jagúar, sjá um útsetningar.

„Við liggjum í útsetningum á lögunum. Þetta er stærsta verkefnið mitt á árinu,“ segir Páll, sem var í óðaönn að undirbúa afmælisveislu sína á Nasa þegar Fréttablaðið náði í hann á föstudag. Stórafmæli poppstjörnunnar ber svo upp á morgun.

„Ég vil gera 70‘s diskó-útgáfur af þessum lögum. Taka það alveg þangað. Svo fæ ég tækifæri með Sinfó að taka stóru ballöðurnar og gera þær grand.“ - afb