Buffon: Moreno var uppdópaður á HM

Gianluigi Buffon var fljótur til að skjóta á Byron Moreno, fyrrverandi knattspyrnudómara, sem var handtekinn með sex kílógrömm af heróíni í sínum fórum í Bandaríkjunum.

Moreno dæmdi viðureign Ítalíu og Suður-Kóreu í 16-liða úrslitum HM árið 2002. Halla þótti mjög á ítalska liðið í leiknum en Suður-Kórea komst áfram eftir að hafa skorað gullmark í framlengingu.

„Sex kíló af eiturlyfjum? Mér finnst líklegt að Moreno hafi verið með svo mikið í líkamanum sínum árið 2002 - ekki í nærbuxunum," sagði Buffon í samtali við ítalska fjölmiðla í dag.

„En öllu gríni slepptu þá er hætt við því að þegar fólk úr íþróttaheiminum snýr sér að eiturlyfjum að þá verði botninum náð og íþróttin líður fyrir það."