Knattspyrnudómari tekinn með heróín

Ekvadorinn Byron Moreno, fyrrum knattspyrnudómari, var handtekinn á JFK-flugvellinum í New York með sex kílógrömm af heróíni í sínum fórum.

Moreno þessi er þekktastur fyrir að hafa dæmt viðureign og Suður-Kóreu og Ítalíu á HM árið 2002. Mörg dómaramistök voru gerð í þeirri keppni sem áttu sinn þátt í því að mörg stórlið féllu úr leik og Suður-Kórea komst alla leið í undanúrslit.

Leikurinn sem Moreno dæmdi var í 16-liða úrslitunum. Í framlengingu leiksins dæmdi hann gullmark Damiano Tommasi ólöglegt en það hefði fleytt Ítalíu áfram í fjórðungsúrslitin. Markið virtist hins vegar fullkomnlega löglegt.

Þar að auki fékk Francesco Totti að líta rauða spjaldið í leiknum fyrir leikaraskap en upptökur í sjónvarpi sýndu að hann hefði misst fótanna. Þá fékk Suður-Kórea umdeilda vítaspyrnu sem var reyndar misnotuð.

Moreno þessi fékk einnig 20 leikja bann á sínum tíma fyrir að bæta við þrettán mínútum við venjulegan leiktíma í viðureign í heimalandinu. Þá tókst öðru liðinu að skora tvívegis og tryggja sér 4-3 sigur í leiknum.