Skattbyrðin hér á landi er sögð svipuð og í Danmörku

Skattbyrði Íslendinga er með því mesta sem gerist í aðildarlöndum Efnahags- og framfarastofnunar Evrópu (OECD), samkvæmt útreikningum sérfræðinga Alþjóðagjaldeyrissjóðsins (AGS). Þetta kemur fram í skýrslu um íslenska skattkerfið, sem AGS vann að beiðni íslenskra stjórnvalda.

Sérfræðingar sjóðsins reikna skattbyrðina sem hlutfall skatta af vergri landsframleiðslu. Nýjustu samanburðarhæfu tölurnar eru frá árinu 2007. AGS telur það skekkja verulega einfaldan samanburð á íslenska skattkerfinu og kerfinu á hinum Norðurlöndunum að Íslendingar greiða í sjálfstæða lífeyrissjóði til að tryggja sér lífeyri. Á hinum Norðurlöndunum greiðir fólk hærri skatta og ríkið sér alfarið um slík lífeyrismál.

AGS notar tvær mismunandi leiðir til að bera skattbyrðina á Íslandi saman við hin Norðurlöndin, og OECD-löndin.

Í fyrsta lagi er skattheimta á Íslandi borin saman við skatta erlendis þar sem skattar til að fjármagna lífeyrisgreiðslur sem hér fara í lífeyriskerfið eru undanskildir.

Þá er skattheimta á Íslandi 37,7 prósent af vergri landsframleiðslu, umtalsvert hærri en í Noregi, Svíþjóð og Finnlandi, eins og sjá má í meðfylgjandi mynd. Skattheimtan er hins vegar meiri í Danmörku, 47,7 prósent

Hin leiðin sem AGS notar til að bera saman skattbyrðar milli Íslands og nágrannalandanna er að bæta greiðslum í lífeyrissjóði við skattgreiðslur.

Þá reiknast skattbyrðin á árinu 2007 sem 48,5 prósent af vergri landsframleiðslu. Það er örlítið undir skattbyrðinni í Danmörku, sem var 48,7 prósent, og svipað og hlutfallið í Svíþjóð, 48,3 prósent. Hlutfallið er mun lægra í Noregi og Finnlandi, 43,6 prósent annars vegar og 43 prósent hins vegar.

Fjármagnstekjuskattur var tíu prósent fram á mitt ár 2009, þegar hann var hækkaður í fimmtán prósent, og svo í átján prósent í ár. Þrátt fyrir að skatturinn hafi verið næstum tvöfaldaður er hann enn talsvert lægri en á hinum Norðurlöndunum. Þetta segja sérfræðingar AGS að hluta til skýrast af ólíkum reglum um frádrátt, en segja engu að síður borð fyrir báru að hækka skattinn í 20 prósent.

Virðisaukaskattur er hvergi innan aðildarríkja OECD hærri en hér á landi, 25,5 prósent. Skatturinn er þó svipaður í Danmörku, 25 prósent, en þar er ekkert lægra skattþrep fyrir matvæli, rafmagn, hita og fleira. Sérfræðingar AGS gerðu ekki tilraun til að meta mun á þjónustugjöldum eða öðrum kostnaði skattgreiðenda utan við beinar skattgreiðslur. Ekki var heldur metið hvaða þjónusta fæst fyrir það fé sem greitt er í skatt.