Skemmtistaðir með sérþjálfaða dyraverði

„Allir okkar starfsmenn eru í högg- og stunguvestum, með talstöðvar og geta með lítilli fyrirhöfn haft samband við lögreglu upp á aðstoð. Við erum síðan kannski með þrjá staði á svipuðu svæði og ef það er mikið að gera á einum er lítið mál að fá aðstoð frá öðrum," segir Stefán Stefánsson, framkvæmdastjóri öryggisfyrirtækisins Terr, sem sér um dyragæslu á ellefu skemmtistöðum í miðborg Reykjavíkur.

„Ég fékk þessa hugmynd fyrir um ári síðan. Ég er búinn að vera í þessum bransa í fimm ár og menn hafa eiginlega bara getað gengið í þessa stöðu án þess að vera með nokkra þjálfun," segir Stefán um fyrirtæki sitt. Hann fullyrðir að starfsmenn sínir séu með hreint sakarvottorð og gangist undir stífa dyravarðaþjálfun áður en þeir taka til starfa. Það sé í samræmi við reglur um skemmtanahald sem oft hafi verið misbrestur á að skemmtistaðir hafi fylgt.

Stefán segir að minna sé um pústra og slagsmál eftir að fyrirtæki hans kom að dyravörslu í miðbænum. Meiri fagmennska sé nú ríkjandi. „Það er miklu minni hreyfing á dyravörðum, nú er þetta fólk sem er að vinna hjá okkur í meira en þrjá til sex mánuði, áður voru menn kannski bara mánuð í senn," segir Stefán og bætir því við að starfsfólkið finni til meira öryggis en áður þegar það veit af sérþjálfuðum dyravörðum. - fgg