Býður Evu Maríu á stefnumót

Ingi Þór Óskarsson úr Gettu betur-liði Menntaskólans við Hamrahlíð hefur ákveðið að standast áskorun og bjóða spyrlinum Evu Maríu Jónsdóttur á stefnumót. Ingi Þór og félagar etja kappi við Verslunarskólann í 8 liða úrslitum Gettu betur á laugardaginn og þar ætlar hann að bera spurninguna fram.

„Það fer bráðum að koma að þessu,“ segir Ingi Þór, hvergi banginn.

Vinir hans skoruðu á hann að bjóða Evu Maríu á stefnumót á góðgerðarviku í MH síðasta haust. Reiddu þeir fram fimmtán þúsund krónur og rann allur ágóðinn til Barnaspítala Hringsins. Núna er komið að Inga að standa í stykkinu. Fari svo að Eva þekkist boðið yrði það vafalítið óvenjuleg sjón að sjá hina óléttu sjónvarpskonu á stefnumóti með ungum menntaskólanema.

„Einhvern tímann er alltaf fyrst,“ segir Ingi, léttur í bragði.

Undirbúningur fyrir viðureignina gegn Versló hefur gengið vel að sögn Inga. Að sjálfsögðu stefnir hann á sigur og vonast í framhaldinu til að hefna ófaranna frá því í fyrra þegar MH tapaði fyrir MR í úrslitunum eftir spennandi viðureign. „Við erum með sama lið og erum búin að bæta okkur eitthvað, myndi ég segja,“ segir hann. - fb