Sanitas er Icesave-platan í ár

Ólafur Josephsson tónlistar­maður hefur sent frá sér sjöttu breiðskífuna undir nafninu Stafrænn Hákon. Fyrstu plöturnar voru einfalt ósungið heimabrugg en síðustu ár hefur Stafrænn Hákon fært sig upp á skaftið og breyst í hljómsveit með þungan og poppaðan hljóðheim.

Sjötta plata Stafræns Hákonar kallast Sanitas og kemur út á vegum Kimi Records eftir páska. Auk þess kemur platan út í Bandaríkjunum á vegum Darla Records og í Asíu á vegum Happy Prince. Ólafur naut aðstoðar ýmissa valinkunnra tónlistarmanna við gerð plötunnar. Þar á meðal samstarfsmanns hans til margra ára, Samuel White, en auk þess hollenskum söngvara sem syngur þrjú lög og breska trommaranum Daniel Lovegrove.

„Þetta var svolítið fyndið, Breti, Hollendingur og Íslendingur að vinna að plötu. Þetta er Icesave-platan í ár," segir Ólafur.

Fyrstu plötur Stafræns Hákonar voru lágstemmt heimabrugg. Fjör færðist í leikinn með plötunni Gumma sem kom út árið 2007. Og nýjasta tónlist Stafræns Hákonar er enn fjölbreyttari en verið hefur; lögin eru mörg hver poppaðri en áður og tónlistin einhvern veginn markvissari. Þetta þakkar Ólafur samstarfsmönnum sínum, ekki síst trommuleikaranum Daníel, en þegar vinna hófst í hljóðveri með honum var mikið af tónlistinni tekin upp aftur og ýmislegt betrumbætt.

Nú er endalaust af aðstoðarkokkum með þér, hefur þú eitthvert hlutverk lengur?

„Ég er eiginlega ekkert í þessu bandi lengur," segir Ólafur hlæjandi. „Nei, ég fékk bara leiða á því að vera einn að saga spýtur úti í horni. Ef maður er einn er svo mikil hætta á því að maður festist í sama farinu og sjái ekki heildarmyndina. Daníel trommari hjálpaði mér mikið með það."

Hvað með heiti plötunnar, Sanitas? Er þetta bara gamla góða gosdrykkjaverksmiðjan?

„Já. Pabbi vann í Sanitas á áttunda áratugnum. Hann er hálfur Íslendingur og hálfur Bandaríkjamaður og býr úti í Bandaríkjunum. Ég er alltaf duglegur að heyra í honum og heimsækja hann og alltaf þegar við ræðum saman spyr hann hvað sé að frétta héðan. Hvað sé að frétta af stóru fyrirtækjunum, eins og Eimskipi, Flugleiðum og Sanitas og svoleiðis. Það er frekar fyndið."

Ólafur er nýfluttur heim eftir að hafa verið búsettur erlendis í átta ár, lengst af í Kaupmannahöfn. Hann er kvæntur, tveggja barna faðir og er nú að leita sér að vinnu.

„Ég kem beint heim í góðærið," grínast hann með. Ólafur hefur gert hljómsveitina út frá Kaupmannahöfn og fengið tónlist sína gefna út víða. Hann hefur því ekki farið varhluta af því að vera spyrtur við Sigur Rós, þá íslensku sveit sem náð hefur lengst í indie-tónlistargeiranum. Ólafur viðurkennir fúslega að Sigur Rósar-stimpillinn hafi farið í taugarnar á sér en hefur búið til skilgreiningu á eigin tónlist sem hann vonar að fólk kveiki á.

„Þegar við vorum á tónleikaferðalagi um Bretland 2007 var alltaf verið að biðja okkur að skilgreina tónlistina. Maður var eitthvað að reyna; smá seyðandi með smá krafti og eitthvað svona bull. Svo duttum við niður á þetta - Power Ambient - og það hitti beint í mark. Og er líka töff."

hdm@frettabladid.is