Spilar á fiðlu með austurrískri poppstjörnu

Fiðluleikaranum Geirþrúði Ásu Guðjónsdóttur bauðst nýverið að spila með austurrísku söngkonunni Önnu F sem slegið hefur í gegn í heimalandi sínu og hitaði meðal annars upp fyrir Lenny Kravitz á tónleikaferðalagi hans í sumar. Geirþrúður hefur verið búsett í Austurríki í tæpt ár þar sem hún stundar einkanám í fiðluleik. „Ég kynntist öðrum fiðluleikara fyrir jól sem spurði mig svo hvort ég vildi taka að mér verkefni. Ég sagði já, því mér finnst alltaf gaman að fá að spila eitthvað annað en klassíska tónlist. Þegar ég kom aftur út til Vínar eftir jólafrí kom í ljós að verkefnið er að spila með þessari stelpu, Önnu F,“ útskýrir Geirþrúður Ása, sem er nýkomin aftur til Vínarborgar eftir að hafa dvalið úti á landi við upptökur á fyrstu plötu Önnu F sem kemur út fyrir helgi. „Mér finnst þetta mjög spennandi verkefni og í þokkabót er hún sjálf alveg yndisleg. Hún er mjög efnilegur tónlistarmaður og semur allt sitt efni sjálf og hún er einnig mjög dugleg að koma sjálfri sér á framfæri. Hún hefur einnig setið fyrir í auglýsingum fyrir Puma og Red Bull þannig að hún er líka með útlitið með sér,“ segir hún og hlær. Sérstakir útgáfutónleikar verða haldnir seinna í mánuðinum til að fagna útgáfu plötunnar og fara þeir fram á einum helsta djassklúbb Vínar. Þar mun Geirþrúður spila undir auk annars fiðluleikara, sellóleikara og hljómsveit. Geirþrúður Ása hefur leikið á fiðlu frá því hún var þriggja ára gömul og á tónlistarnámið hug hennar allan. Aðspurð segist henni líða vel í Vínarborg og býst hún við að dvelja þar um óákveðinn tíma. „Það er voða huggulegt að vera hér í Vín og ég er líka loksins farin að geta talað þýskuna. Stundum á ég erfitt með að skilja ákveðnar mállýskur og verð eins og spurningarmerki í framan, en annars gengur þetta mjög vel. Fólk er líka mjög duglegt að hjálpa manni með tungumálið og leiðrétta mig þegar þess þarf,“ segir Geirþrúður Ása að lokum. Hægt er að skoða upptöku af tónleikum sem Geirþrúður Ása spilaði með Önnu F á síðunni www.tv-media.at. sara@frettabladid.is