Lífið

Agent Fresco rænd á hollenskri hátíð

agent fresco Hljómsveitin Agent Fresco var rænd á tónlistarhátíðinni Eurosonic sem var haldin í Hollandi. 
FRÉTTABLAÐIÐ/VILHELM
agent fresco Hljómsveitin Agent Fresco var rænd á tónlistarhátíðinni Eurosonic sem var haldin í Hollandi. FRÉTTABLAÐIÐ/VILHELM

„Kvöldið var búið að vera æðislegt. Við vorum búnir að vera á frábærum tónleikum með FM Belfast og þá gerist þetta,“ segir Arnór Dan Arnarson, söngvari hljómsveitarinnar Agent Fresco.

Hátt í fimmtíu þúsund krónum var stolið frá Arnóri Dan og félögum hans í Agent Fresco á tónlistarhátíðinni Eurosonic sem var haldin í Hollandi um helgina. Peningunum, sem tapaðist, höfðu þeir félagar safnað með sölu á hljómplötum og stuttermabolum meðan á hátíðinni stóð og því um sérlega leiðinlegt atvik að ræða.

„Þetta gerðist bara fyrir framan okkur á tónleikastaðnum. Hann tók veskið og gaf það áfram og hljóp svo í burtu. Við vorum ekki að fara að elta svona náunga út í eitthvert skuggasund,“ segir Arnór Dan. „Strax klukkutíma eftir þetta var ég hættur að vera brjálaður. Þetta eru bara peningar.“

Í síðasta mánuði var hljómsveitin Ultra Mega Technobandið Stefán einnig rænd á tónlistarhátíð í Hollandi og svo virðist því sem íslenskir tónlistarmenn séu berskjaldaðari en aðrir þar í landi. Hvort Icesave-málið eigi þar einhvern hlut að máli skal ósagt látið. Annars segist Arnór aðeins hafa fengið eina spurningu um Icesave meðan á dvöl hans stóð, sem kom honum nokkuð á óvart.

„Við vorum búnir að lesa ógeðslega mikið um Icesave-málið og orðnir mjög góðir í að svara því. Við erum brjálaðir út af málinu og vorum alveg til í að tala um það en við notum þetta bara heima. Núna vitum við klárlega hvað við erum að fara að kjósa.“ - fb






Fleiri fréttir

Sjá meira


×