Lögbann á auglýsingar Kredia

„Þeir eru að nota karakter sem þeir hafa ekkert leyfi til að nota,“ segir Kjartan Þór Þórðarson, framkvæmdastjóri Saga Film, um auglýsingar smálánafyrirtækisins Kredia.

Saga Film, framleiðandi Nætur-, Dag- og Fangavaktarinnar, fékk í gær lögbann á nýlegar auglýsingar Kredia. Forsvarsmenn framleiðslufyrirtækisins telja að karakterinn í auglýsingunum sé hinn seinheppni Hannes, pabbi Ólafs Ragnars úr Vaktaseríunum þremur.

Kjartan segir að honum hafi brugðið þegar hann sá auglýsingar Kredia, enda sé karakterinn í auglýsingunni alveg eins og Hannes. „Það verður höfðað skaðabótamál. Auglýsingastofan á að vita að svona er ekki eðlilegt að vinna hlutina,“ segir Kjartan, Spurður hversu háa upphæð farið verður fram á segir hann að það sé óvíst.

Júlíus Brjánsson túlkar karakterinn, sem kallast Búbbi Guggi, í auglýsingunni. Hann segist hafa verið beðinn um að leika svarthærðan, lágvaxinn mann. „Ég gerði það og þeir voru ákaflega ánægðir með þennan lágvaxna, svarthærða mann. Að öðru leyti veit ég ekki um hvað er verið að rífast.“

Líturðu ekki svo á að þú hafir verið að túlka Hannes?

„Ef Hannes er líka lágvaxinn og svarthærður. Ég get ekki borið ábyrgð á því hvaða hugrenningar vakna við það.“

Valgeir Magnússon, framkvæmdastjóri auglýsingastofunnar Pipar/TBWA, sem framleiddi auglýsinguna vísar því á bug að ætlunin hafi verið að herma eftir Hannesi. „Karakterinn heitir Búbbi Guggu,“ segir hann.

„Júlíus hefur oft leikið svona karaktera. Hann lék karakter í þáttaröð sem hét Fastir liðir eins og venjulega sem hét Indriði. Hann hafði þessi karaktereinkenni. Hann hafði líka sömu einkenni þegar hann lék manninn hennar Bibbu á Brávallagötunni.“ - afb