Í kókosbolluverksmiðju

„Það var kalt og samloka á hótelinu kostaði 2.600 krónur. Mér fannst það mikið sjokk,“ segir Sindri Már Sigfússon í hljómsveitinni Seabear.

Hljómsveitin spilaði á By:Larm hátíðinni í Osló um helgina. „Þetta er mjög lík hátíð og Airwaves. Við spiluðum á tvennum tónleikum, það var fullt á þeim báðum og mjög góð stemning. Svo spiluðum við í norska sjónvarpinu. Það er eitthvert trend hjá þeim að taka bönd upp að spila á skrýtnum stöðum og þeir létu okkur spila í kókosbolluverksmiðju.“

Aðrir Íslendingar á By:Larm voru Kira Kira, Hafdís Huld og hljómsveitin For a minor reflection. Næst heldur Seabear í Evróputúr, sem hefst í Hannover á sunnudaginn. Um miðjan mars verður bandið svo að spila á SXSW hátíðinni í Austin í Texas. Fimm tónleikar eru fyrirhugaðir þar, en aðeins þau bönd sem mestar vonir eru bundnar við fá að spila svona oft á þessari hátíð. We built a fire, nýjasta plata sveitarinnar, verður fáanleg á Íslandi á cd og vínyl í byrjun mars. - drg