Innilegt faðmlag frá Pamelu Anderson

„Ég held að Pamela viti ekkert allt of mikið um snjóbretti,“ segir snjóbrettakappinn Halldór Helgason.

Eiki, stóri bróðir Halldórs, fékk faðmlag frá kynbombunni Pamelu Anderson á verðlaunahátíð tímaritsins Transworld Snowboarding á dögunum. Eiki var valinn snjóbrettamaður ársins af lesendum tímaritsins á hátíðinni og prýðir forsíðu febrúarheftisins. Halldór segir verðlaunin þau bestu sem hægt er að fá í þessum bransa.

Halldór og Eiki eru atvinnumenn í íþróttinni og hafa verið á fleygiferð undanfarin misseri og sópað að sér viðurkenningum. Eins og Fréttablaðið greindi frá á dögunum þá vann Halldór til gullverðlauna á X-Games íþróttamótinu í Bandaríkjunum og vakti það mikla athygli.

„Það hefur hjálpað mjög mikið,“ segir hann. „Þetta er stærsta og virtasta mót sem maður getur unnið og það hefur aldrei verið jafn stórt og í ár – það er snilld.“

Í dag eru bræðurnir á fullu við að taka upp efni fyrir snjóbrettaútgáfurnar Standard Films og Pirate Productions. Halldór er staddur í Utah í Bandaríkjunum og Eiki er í Japan. „Það er það sem okkur finnst skemmtilegast að gera,“ segir Halldór. „Við erum að taka upp og gerum nákvæmlega það sem við viljum gera.“ - afb