Hvít-Rússar slógu Ítali út í umspili fyrir EM 21 árs liða

Íslenska 21 árs landsliðið mætir ekki Ítölum á Evrópumótinu í Danmörku næsta sumar. Það kom í ljós í dag þegar Hvít-Rússar slógu Ítali út með 3-0 sigri í seinni umspilsleik þjóðanna. Spánn og Tékkland fóru hinsvegar örugglega áfram eftir örugga sigra á útivelli.

Ítalir voru í ágætum málum eftir 2-0 sigur á Hvít-Rússum í fyrri leiknum á Ítalíu en eftir venjulegan leiktíma var staðan 2-0 fyrir Hvíta-Rússland og því þurfti að framlengja. Oleg Veretilo skoraði síðan þriðja mark Hvít-Rússa á sjöttu mínútu framlengingarinnar.

Spánn vann 3-0 sigur í Króatíu og þar með 5-1 samanlagt. Mörk Spánverja í dag skoruðu þeir Álvaro Domínguez (Atlético Madrid), Adrián (Deportivo de La Coruña) og Jeffren (Barcelona).

Tékkar unnu 2-0 sigur í Grikklandi og þar með 5-0 samanlagt.

Sjö þjóðir (af átta) eru nú búnar að tryggja sér sæti á EM í Danmörku en auk gestgjafana og Íslendinga þá munu Svisslendingar, Englendingar, Hvít-Rússar, Spánverjar og Tékkar keppa í úrslitakeppninni sem fer fram í júní á næsta ári.

Síðasti umspilsleikurinn stendur nú yfir en þar mætast Úkraína og Holland í Úkraínu. Úkraínumenn unnu fyrri leikinn 3-1 og það bendir því allt til þess að þeir verði áttunda liðið inn í keppnina.

Það verður síðan dregið í tvo fjögurra liða riðla 9. nóvember í Álaborg í Danmörku.