Biðlistar í bókabúðum eftir Rannsóknarskýrslunni

Langir biðlistar eru í bókabúðum miðbæjarins eftir skýrslu Rannsóknarnefndar Alþingis sem kemur út á mánudaginn. Mikil umfjöllun verður um skýrsluna á RÚV og Stöð 2.

Langþráð bið margra verður á enda á mánudaginn þegar skýrsla Rannsóknarnefndar Alþingis verður öllum aðgengileg á vef nefndarinnar. Samkvæmt upplýsingum frá skrifstofu Alþingis verður hinni tvö þúsund síðna skýrslu dreift í bókabúðir klukkan hálf ellefu um morguninn.

„Við erum með nokkur símanúmer sem við eigum að hringja í þegar skýrslan kemur í hús. Það er mikil spenna í loftinu," segir Elsa María Ólafsdóttir, verslunarstjóri í bókabúð Pennans við Skólavörðustíg. Hún vonast til að skýrslan komi fljótt í hús en búið er að taka frá sérstakt bretti sem skýrslan verður sett á og verður það á besta staðnum í bókabúðinni.

Dögg Hjaltalín, verslunarstjóri í Mál og menningu á Laugavegi, segir þau ekki vera með neinn biðlista. Þau ætli hins vegar að vera með hljóðnema sem fólk getur gripið í ef það vill tjá sig. Enda má búast við að mörgum verði mikið niðri fyrir þennan dag. „Fólk má lesa upp úr skýrslunni ef það vill, lesa ljóð sem tengjast skýrslunni eða hreinlega syngja lag, við viljum bara gefa fólki leyfi til að pústa aðeins og fá tækifæri til að tjá sig," segir Dögg.

Í sama streng tekur Svanborg Sigurðardóttir, verslunarstjóri í Eymundsson í Austurstræti. „Við erum með langan biðlista hjá okkur af fólki sem er búið að taka þetta rit frá. Það hringir fólk á hverjum degi og tryggir sér eintak," útskýrir Svanborg en líkt og á Skólavörðustíg verður skýrslan á besta stað í versluninni.

Arndís Björg Sigurgeirsdóttir, verslunarstjóri í Iðu við Lækjargötu, er hins vegar efins um að fólk muni flykkjast í stórum stíl í bókabúðir og kaupa sér eintak af þessum mikla doðranti sem skýrslan óneitanlega verður.

freyrgigja@frettabladid.is