Carlos Tevez segist vera á förum frá Man City

Argentínumaðurinn Carlos Tevez vill fara frá Manchester City. Hann segist ekki geta unnið með vissum aðilum hjá félaginu og það sé ekki hægt að laga. Í tilkynningu sem hann sendi frá sér í kvöld segist hann vera á förum.

Tevez hefur sagt að ekkert illt sé milli hans og knattspyrnustjórans Roberto Mancini. „Ég hef eytt mörgum klukkustundum í að hugsa þetta mál," segir Tevez.

Í yfirlýsingu frá leikmanninum segist hann fyrst hafa beðið um að fá að fara í sumar en stjórnarmenn City vildu ekki setja hann á sölulista þá. „Því miður hefur afstaða mín ekkert breyst síðan þá," segir Tevez sem vill þakka eiganda félagsins fyrir að sýna sér skilning.

Talið er að heimþrá spili inn í þessa ákvörðun sóknarmannsins en dætur hans eru búsettar í Argentínu.