Gylfi baunar á borgarstjórann

Tónlistarmaðurinn Gylfi Blöndal er ósáttur við Hönnu Birnu Kristjánsdóttur borgarstjóra og sakar hana um að hunsa athugasemdir sínar.

„Hanna Birna, eða einhver á hennar vegum, eyddi út athugasemd sem ég setti inn á Facebook-síðuna hennar á mánudaginn,“ segir Gylfi Blöndal, gítarleikari í Kimono og skipuleggjandi hjá rokkbúllunni Sódómu Reykjavík. Gylfi setti inn athugasemd í framhaldi af lesendabréfi Hönnu Birnu í Fréttablaðinu á mánudaginn, þar sem hún dásamaði samstillt hreinsunarátak borgarinnar og íbúanna, sem nú er að fara í gang.

„Ég sagðist vera að hlæja mig máttlausan yfir hreinsunarátaki Reykjavíkurborgar og lagði til að Hanna Birna byrjaði á að ganga um miðbæinn og virða fyrir sér brunarústir, yfirgefin hús, ófrágengna húsgrunna og annað rusl,“ segir Gylfi og bætir við: „Gettó-væðing miðbæjarins er í fullum gangi. Ég veit ekki í hvaða hverfi Hanna býr en ég er viss um að þar færi allt á annan endann ef það sama yrði látið viðgangast þar og í 101.“

Aðstoðarmaður Hönnu Birnu, Magnús Þór Gylfason, segir að þessi samsæriskenning Gylfa eigi ekki við nokkur rök að styðjast. „Það var einfaldlega verið að breyta stillingum á síðunni og þá féllu því miður einhverjar af athugasemdunum út, ekki bara athugasemdin hans. Þetta var bara góð hvatning til borgaryfirvalda hjá honum. Því hefði engin ástæða verið til að henda henni út, enda fagnar borgarstjóri öllum viðbrögðum og ábendingum borgarbúa. Varðandi ástandið í miðbænum þá er miklum fjármunum varið til hreinsunar þar, en umrætt hreinsunarátak mun að sjálfsögðu taka til þess svæðis eins og til annarra svæða í borginni. Ég vona að Gylfi taki þátt í því með okkur.“drgunni@frettabladid.is