Dave Smith semur við Bloodgroup

„Við notum græjurnar frá þeim mjög mikið,“ segir Ragnar Láki, meðlimur hljómsveitarinnar Bloodgroup.

Ragnar hefur gert samning við hljóðgervlafyrirtækið Dave Smith sem felur í sér ríflegan afslátt af hljóðfærum og búnaði. Sagan af samningnum hófst þegar hljóðgervill Ragnars bilaði. „Ég og ein sem vinnur þarna vorum í email-samskiptum, hún var að hjálpa mér að laga þetta,“ segir hann, „Það tókst svo vel og ég var svo þakklátur að ég sendi henni lag með okkur að gjöf. Hún leyfði öllum í fyrirtækinu að heyra og þau fíluðu það svo vel að þau buðu mér dílinn.“

Nafn Ragnars er í fríðum hópi á lista á vefsíðu Dave Smith yfir listamenn sem nota hljóðfæri frá framleiðandanum. Þar eru meðal annars Joe Lester úr Silversun Pickups, Feliz Martin úr Hot Chip og sjálfur Chris Martin úr Coldplay.

„Þetta er flottur listi,“ segir Ragnar og bætir við að auk afsláttarins sé fín kynning fólgin í því að vera á listanum. - afb