Skjaldborg haldin í fjórða sinn

Hvítasunnuhelgina 21.–24. maí verður Skjaldborg, hátíð íslenskra heimildar­mynda, haldin í fjórða sinn á Patreksfirði. Auk þess að frumsýna nýjar íslenskar heimildarmyndir er hátíðinni ætlað að vera tækifæri fyrir kvikmyndagerðarfólk og áhugamenn um heimildarmyndir til að koma saman. Í lok hátíðarinnar verður besta heimildarmyndin á Skjaldborg 2010 valin af áhorfendum.

„Þarna fjölmennir fólk, bæði kvikmyndagerðarmenn og áhugamenn. Það skapast frábær stemning þegar menn fara með þetta út úr bænum. Þetta er skemmtilega einangrað og það skapast mikil samkennd í hópnum,“ segir leikstjórinn Hafsteinn Gunnar Sigurðsson, einn af skipuleggjendum hátíðarinnar.

Á Skjaldborgarhátíðinni í fyrra voru frumsýndar hátt í þrjátíu heimildarmyndir og hlaut dagskráin mjög góðar viðtökur. Mikil gróska er í heimildarmyndagerð hér á landi á sama tíma og erfitt er að fá myndirnar sýndar í kvikmyndahúsum eða sjónvarpi. Skjaldborg sýnir því heimildarmyndir sem annars kæmu varla fyrir augu almennings.

Umsóknarfrestur til að senda mynd á hátíðina er til 1. maí. Til að heimildarmynd teljist gjaldgeng á Skjaldborg má hún hvorki hafa verið sýnd í sjónvarpi né í kvikmyndahúsi. Nánari upplýsingar má finna á Skjaldborgfilmfest.com. - fb