Robin Hood klúðraði fyrsta sætinu í Bandaríkjunum

Ridley Scott og Russell Crowe voru væntanlega ekki sáttir þegar þeir fengu bíótölur helgarinnar í Bandaríkjunum í hendurnar í morgun. Þeir félagar flatmaga nú á Rívíerunni í Frakklandi þar sem þeir frumsýndu Robin Hood með pompi og prakt á miðvikudaginn var.

Robin Hood náði ekki að slá Iron Man 2 út og munaði þó nokkru. Iron Man halaði inn 53 milljónir dollara en Robin Hood 37. Iron Man er að vísu búin að vera hrikalega vinsæl frá frumsýningu og er greinilega ekkert lát á.

Þó að þetta sé kannski ekki ásættanlegur árangur þurfa Ridley og Russell ekkert að fara á límingunum. Robin Hood er nefninlega tekjuhæsta myndin á heimsvísu eftir helgina og náði langleiðina í kostnaðinn. Þegar 57 lönd eru tekin saman náði hún 111 milljónum dollara í kassann en hún kostaði um 155 milljónir.