Aladdín í gamalli verksmiðju

Leikfélag Menntaskólans við Sund frumsýnir nýjan söngleik byggðan á hinni klassísku sögu um Aladdín í kvöld kl. 20. Leikstjóri verksins og höfundur leikgerðar er Kolbrún Björt Sigfúsdóttir.

„Við byggjum leikgerðina mikið á Disney-myndinni og blöndum saman við söguna úr 1001 nótt," segir Kolbrún. „Þetta er fjölskyldusýning og ekkert blótað, það er sáralítið ofbeldi og ekkert klám. Við notum tónlistina úr myndinni en setjum hana í nýjan búning og svo er mikið dansað. Leikgerð og búningar eru í hefðbundnum stíl, það er allt á sínum stað, Aladdín-buxurnar og andinn í lampanum."

Þrjátíu manns taka þátt í uppsetningunni, allt krakkar úr MS nema Kolbrún, danshöfundurinn Katrín Gunnarsdóttir og tæknistjórinn Erlingur Grétar Einarsson. Tónlistarstjóri er Albert Hauksson (hann lék Harry Potter í fyrra) og fer fyrir sjö manna bandi. Þorbjörn Óli Árnason leikur Aladdín, Ísold Antonsdóttir leikur Jasmín og Gígja Hilmarsdóttir leikur andann. Fyrirhugaðar eru alls níu sýningar og verður sýnt kl. 20 á laugardags- og sunnudagskvöldum. Panta má miða á aladdin@belja.is eða í síma 6915770. Miðaverð er 2.000 krónur.

Sýningin fer fram í Norðurpólnum, sem er ný miðstöð menningar og lista í Bygggörðum 5, úti á Granda. Þar var Borgarprent áður til húsa, en nú er búið að breyta húsnæðinu. Standsettir hafa verið tveir sýningarsalir og tvö rými til æfinga. Margir hafa þegar sýnt húsnæðinu áhuga, meðal annars fimm menntaskólaleikhópar og danshópar og má búast við líflegri listastarfsemi þarna á næstu misserum.

drgunni@frettabladid.is